ترجومه ي -حال
یازار : نژادمحمد | بؤلوم : حيات يولو
رضايئو رسول ايبراهيم اوغلو - شاعر، دراماتورق، 1934-جو ايلدن آذربايجان يازيچيلار بيرليگينين عضوو، سوسياليست اميي قهرماني (1980)، آذربايجانين خالق شاعري (1960)، سسري دؤولت موكافاتي لاورئاتي (1951)، آذربايجان آلي سووئتينين دئپوتاتي، آذر- بايجانين امكدار اينجهسنت خاديمي (1945).
1910-جو ايل مايين 19-دا آذربايجانين گؤيچاي شهرينده معاريفپرور عائلهده دوغولموشدور. منشأ اعتباري ايله تانينميش مممدخانوولار نسليندن اولان آتاسي ايبراهيم كندده ميرزهليك و خيرداواتچيليقلا دولانميشدير.
آناسي مريم پوئتيك ايستئدادا ماليك اولموش، اؤز شئرلريني ازبر ياددا ساخلاييرميش. آتاسيني ائركن ايتيرميش، آناسينين و ياخين قوهوملارينين حمايهسينده بويا-باشا چاتميشدير.
1924-جو ايلده اويلكگي سيرالارينا داخيل اولور، گؤيچايين اجتماعي حياتيندا فعال ايشتيراك ائدير: درام درنيي يارادير، شهرده، كندلرده تاماشالار وئرير. گؤيچاي شهر كيتابخاناسيندا مودير (1924)، همكارلار كلوبوندا گنجلر بؤلمهسينين (1925) ايشلهيير، تبيليسيده زاقافقازييا كوممونيست اونيوئرسيتئتينين كووپئراسييا شؤبهسينده تحصيل آلير (1926-1927).
بو دؤورده ايلك شئريني «قيغييجيم» آلماناخيندا چاپ ائتديرير. «دان اولدوزو» ژورناليندا «اوغول قاتيلي»، «آروادباز»، «ديلاره» هئكايهلري، «يئني فيكير» و «زاريا ووستوكا» قزئتلرينده بير نئچه شئري درج اولونور. 1930-جو ايلده باكييا كؤچمهسي اونون ياراديجيليغيندا دؤنوش يارادير. «گنج ايشچي» قزئتي رئداكسيياسيندا ترجومهچي كيمي ايشه دوزهلير، مقاله، اوچئرك و شئرلريني مونتزم چاپ ائتديرمهيه باشلايير. «چاپئي» آدلي ايلك شئر كيتابيندا اولان «بولشئويك يازي» شئري ايله اؤز ياراديجيليق يولونو اعلان ائدير. او، آذربايجان علمي تدقيقات اينستيتوتونون آسپيرانتوراسيندا (1931-1933)، موسكوادا كينئماتوقرافييا اينستيتوتوندا تحصيليني داوام ائتديرير (1934-1937).
باكي كينوستوديياسيندا سسئناري شؤبهسينين ريسي (1937-1938)، آذربايجان دؤولت فيلارمونيياسينين موديري (1938)، آذربايجان سووئت يازيچيلاري اتفاقينين صدري (1938-1939)، باكي كينوستوديياسينين موديري (1942-1944)، كينئماتوقرافييا ايدارهسينده ريس (1944-1946)، آذربايجان سسر كينئماتوقرافييا ناظري (1946-1949)، آذربايجان سووئت ائنسيكلوپئديياسينين باش رئداكسيياسينين باش رئداكتورو، عومومدونيا سولهو مدافعه كوميتهسي رياست هئيتينين عضوو، آفريكا و آسييا اؤلكلري سووئت همريليك كوميتهسي رياست هئيتينين عضوو و رئسپوبليكا عذره صدري، سسري يازيچيلار اتفاقي رياست هئيتينين عضوو، «نوووستي» مطبوعات آگئنتليگينين آذربايجان شؤبهسي ايدارهسينين صدري، آذربايجان رئسپوبليكاسي آلي سووئتينين (يئددي چاغيريش) دئپوتاتي، آذربايجان كپ تفتيش كوميسسيياسينين عضوو سئچيلميش، لئنين و سسري دؤولت موكافاتلاري كوميتهسينين عضوو اولموشدور.
خيدمتلري يوكسك قييمتلنديريلميش، اونا فخري آدلار وئريلميش، اوچ دفعه لئنين اوردئني و مئداللارلا تلتيف ائديلميشدير.
1981-جي ايل آپرئلين 1-ده باكيدا وفات ائتميش، فخري خيياباندا دفن اولونموشدور. باكي كوچهلريندن بيري اونون آديني داشييير.
رسول رضانين حيات يولداشي – شاعره نيگار ، آذربايجانين خالق شاعري. اونلارين اوغلو – آنار ، 1938-جي ايلده آنادان اولموش، مهشور يازيچي، دراماتورق، سجئناريست و كينورئژيسسورو، آذربايجان يازيچيلار بيرليگينين عضوو.
ائسخيل (قديم يونان دراماتورقو)
یازار : نژادمحمد | بؤلوم : رسول رضادان ترجومهلر
"زئنجيرلنميش پرومئتئي” فاجعه سينين فينالي
پرومئتئي
بو مصلحتلرينين كيمه فايداسي واردير؟
قولاقلاريم دالغا تك بو سؤزلرينله كاردير.
زنن ائتمه من قورخاراق زئوسدن، بير آرواد كيمي
گؤتورهجهيم گئري سنه دئديكلريمي.
قادين كيمي يالواريب دئيهجهيم، آماندير
مني گل خلاص ائله!
يوخ، زنن ائتمه يالاندير.
بونو گؤرمهيهجكسن؛ منده اونا قارشي بيل،
اولان سونسوز نيفرتدير، اصلا باشقا شئي دئييل.
هئرمئس گؤرونور نصيحتيم منيم، عبثدير عبث،
بئله قلبه يالواريش، مصلحت تأثير ائتمز.
شاهه قالخير، سيچرايير مانعه گؤرن كيمي؛
جيلووونو گميرير، هارين بير كؤهلن كيمي.
لاكين گوجسوزدور سنين حيلهلرين، كلهيين.
تدبيرسيز اولانلارا قورور بونو بيل يقين
بير منفت گتيرمز، دئديكلريمز اكر
بويون ايمهسن، اوندا طوفان كيمي بلالار
سني حاقلاياجاقدير.
اود ضربهسييله آتام
گوله دؤندرهجكدير بو داش قاياني تامام
داشلارين آراسيندا ووجودون قالاجاقدير.
بو داغار ويرانهسي مزارين اولاجاقدير. كئچهجك قاتار-
قاتار اوزون ايللر، عصرلر. يئنيدن بو دونيايا سن
چيخينجايا قدر
زئوسين قانادلي ايتي- قانلي قارتال گلهجك،
سنين او پارچا-پارچا ووجودونو دلهجك.
ديدهجك ديمديگيله، جايناقلارييلا مودام
سنين قارا باغريني هر گون، سه سحر، آخشام.
زنن ائتمه كي، بو عذاب، بو ايشگنجه قورتارار.
بير يئني الله اگر چيخيب وئرمسه قرار.
سني عوض ائتمهيه. تارتارين گيردابينا
جهنمه گيرمهي…دوشون، دقت ائت بونا.
بو ساده لووغالانماق، تهديد ائلهمك دئييل.
بو قطعي بير قراردير…ياخشي دوشون، ياخشي بيل!
هله زئوسين ديلينه بير يالان گلمهميشدير.
دئدي، اولاجاق دئمك، بو حل اولموش بير ايشدير.
دوشون، ساده قورورچون عقليني، كماليني
قوربان وئرمه، مهو ائتمه، اؤزون ايستيقباليني.
اوكئانيدلرين بؤيويو
بيزه ائله گلير كي، هئرمئس سؤزونده حاقدير.
او دئيير: بو ايناددان فايدا چيخماياجاقدير.
عاغيللي سؤزو دينله، گل آرتيرما گوناهي.
پئشمانليقدير يئنه ده جورمكارين پناهي!
مودريكلرچين ياراماز يئرسيز، قورو بير ايناد،
يولا گلسن ياخشيدير، دوشون، بو ترسليگي آت.
پرومئتئي
اونون ايندي دئديگي چوخدان اياندير.
منه ظلم ائدن، من بيليرسينيز دوشماندير.
بوردا قريبه نه وار، آلوو ديللري بوراق،
يانديرسين، ياخسين مني، دؤورمده قيوريلاراق.
قوي گؤي گورولتوسوندا، يئللرين شدّتيندن
پارچالانسين بو بوشلوق، فزا يئردن گؤيتن
… تيترهسين يارپاق كيمي يئري قاسيرغا، طوفان.
دالغالانيب دريالار، اويانسين ياتاغيندان.
ايتيرسين اؤز يولونو اولدوزلارين كارواني،
بو حركت، گورولتو چالخالاسين هر ياني.
توللاسين ووجودومو، قارا تارتار ديبينه، لاكين طالعيين
دمير كيردابلاريندا يئنه
مني اؤلدوره بيلمز، يوخدور بونا قودرتي.
هئرمئس
دليلر ائدر آنجاق بو عاغيلسيز صؤحبتي.
دقتله باخين اونا، ايندي نه فرقي واردير
اونون جوشغون ديليدن، نيتي آشيكاردير.
اؤزونو اؤيوب دورور، بو قورخوسوز گوناهكار.
تئز بوردان اوزاقلاشين، يوبانمايين بير آن دا.
يوخسا شيمشكلر چاخيب، گؤيلر گورولداياندا
سارسيلاراق آغلينيز، قارالار گؤزلرينيز؛
اوندان كنار چكيلين، اوندان اوزاقلاشين سيز!
اوكئانيدلرين بؤيويو
سن باشقا مصلحت وئر، قولاق آسيم سؤزونه،
يئرسيزدير بو قايغيلار، سؤيلهييرم اؤزونه.
اوتانيرام دوغروسو، سنين بو سؤزلريندن،
يوخسا فيكرين بودور كي، آلچاقليق ائلهييم من؟
نه اولور-اولسون بوراخ، من راضييام اونونلا.
بيرگه گريم سينمي، كلير گلسين هر بلا.
نيفرت بسلهييرم من خاينلره ازلدن،
گؤزومون دوشمنيدير هر بير آرا دوزلدن.
هئرمئس
اونوتمايين، اولدن سيزي ائديم خبردار،
بلا اوز وئرن زامان، باشلايان زامان قرار،
شيكايت باشلامايين طالعدن، ائيواه — دئيه
كي، زئوس سالميشدير سيزي ناكهاني بلايه.
بوتون بو فلاكتين او دئييل سببكاري،
اؤزونوزسونوز آنجاق، چونكي اولاجاقلاري او، سيزه وئردي
خبر...
بوردا نه گيزلي فعل وار، نه ناگهاني بلا، نه گؤزلنمز بير قرار.
عاغيلسيزليغينيزدان بو تورا دولاشدينيز،
فلاكت قاپيسيني سيز اؤزونوز آچدينيز! (هئرمئس كئدير)
پرومئتئي
آرتيق سؤزلرده دئييل، حقيقتده، باخين بير!
بير قورو يارپاق كيمي، بوتون يئرلر تيترگير.
بوغوق گورولتولارلا گؤيلر نعره چكير، باخ، كولكلر آت
اوينادير، توزلاري قالديراراق.
يئرلر گلير اوز-اوزه، دلي بير رقص ايچينده.
طوفانلار فرياد ائدير، قاريشيق سس ايچينده.
گؤيلر يئره قاريشيب، يئر شاهه قالخير، بودور
گيردابلار، فيرتينالار شدّتلهنير،قودورور.
غضبلهنير زئوس اؤزو، بو طوفانلاري بوتون
اوزريمه گؤندرير مني قورخوتماق اوچون.
ائي ساحلسيز ماويليك، سن ائي مقدس آنا،
اؤزون باخ، دقتله باخ، بو موزتريب اوغلونا.
اؤز گؤزونله گؤر باري.
من ناحاقدان چكيرم بوتون بو عذابلاري.
(گؤي گورولتولاري و ايلديريم ايشيقلاري ايچينده يئر ياريلير، پرومئتئي يئره چؤكور).
پوئزييا زحمت و ايلهامدير
یازار : نژادمحمد | بؤلوم : پوبليسيستيكا
منيم گنجليك، قوجاليق، خيانت و صداقت حاققينداكي شئريمده بئله ميصراعلار وار (من بو شئري اوچ ايل اوول يازميشام): گنجليك اؤزو گئدير،
قوجاليق اؤزو گلير.
نه اونو ساخلايا بيلديم،
نه بوندان قورونا بيليرم.
ايندي گنجليگي، كئچن ايللري، اونداكي واختي، سئوينجلري و كدرلري يادا سالماق ايستهييرم. عومور تقويمي حاقيندا يازماق - كئچنلري خاتيرلاماق، يادا سالماق دئمكدير. يئنيدن بير داها گئري دؤنمهيهجك گونلره قاييديرام، دوشونجهلريمي، حيسسلريمي، اوميد و آرزولاريمي خاتيرلاييرام، بيلا واسيطه حياتيم، ايشيم و طالعييمله باغلي اولان حادثهلري خاتيرلاييرام.
حيات قريبه شئيدير. اونون ائله صحيفهلري وار كي، آنلاماق، ايضاح ائتمك چتين، اونوتماق داها چتيندير. ائله صحيفهلر وار كي، آرادان اون ايللر كئچديگينه باخماياراق، قئيري-رئال گؤرونور، شفاف بير دومانا بورونور.
اولوب كئچن حادثهلري، اجتماعي و شخصي حيات فاكتلاريني ذهنيميزين آيناسيندا ديريلتديكجه، بيز اونلاري اساس اعتباريله، قئيري-ايختيياري اولاراق، بو گونون ايدراك طرزي و دونياگؤروشو پوزيسيياسيندان قييمتلنديريريك. بئله حاللاردا بو و ديگر فاكتلارين اؤز واختيندا قئيده آلينماسي چوخ كؤمك ائده بيلردي. بو فاكتلار يالنيز تفررواتي نظردن قاچيرماديقلارينا گؤره قييمتلي دئييل، اساساً، اونا گؤره موهوم اهميت كسب ائدير كي، او زامانكي منليگيميزي داها دوزگون عكس ائتديرمك قودرتينه ماليكدير. بورادا هر شئي، ائله بيل كي، قفلت يوخوسونا قرق اولوب، ايستهديگي زامان اويانا بيلر، بوتون بكارتي ايله قارشييا چيخا بيلر، اؤتن ايللرين يوكوندن آزاد اولا بيلر. تأسفله دئمهلييم كي، منيم بئله قئيدلريم يوخدور، وارسا دا، چوخ آزدير. حيات تقويميني يازماق فيكرينه دوشدويون زامان بو كسيري داها كسكين حيسس ائديرسن. دئييلنه گؤره، من 1910-جو ايلده مايين 19-دا آنادان اولموشام.
دئييلنه گؤره دئييرم، چونكي بو تاريخ دوزگون اولمايا بيلر. آنادان اولدوغوم ايلي و گونو بابام اليازماسييلا قورآنين صحيفهلريندن بيرينده قئيد ائديبميش. قورآن رنگلي ناخيشلا بزهديلميش نادير بير نوسخه ايميش. بابامي دفن ائدن زامان (منيم اوندا اوچ-دؤرد ياشيم اولاردي) قورآن يوخا چيخيب.
آنا بابام قاتي بير ديندار ايدي. او، ساوادلي ايميش، نظمي، خصوصيله، ديني مؤوضولاردا يازيلميش نظمي چوخ سئورميش. فيردووسيني، سديني، جاميني سئورميش، عمر خييامي اللهسيز حساب ائدرميش.
آتام ميرزه ايبراهيم كند ميرزهسي ايدي. "ميرزه" لقبي ده ائله بورادان گلير. آتام واختي ايله مشهور اولموش مممدخانوولار نسليندن ايدي. اونون اوشاقليق ايللري چوخ آغير شرايطده كئچيب. هله چوخ گنج ياشلاريندا ايكن آناسيز قالميش، اؤگئي آنانين بد خاصيتي اوجوندان آتام ايكي قارداشي ايله بيرليكده اؤز دوغما ائولريندن چيخيب گئتمهيه مجبور اولموش، موستقيل زحمت حياتينا باشلاميشدير. گنج ايبراهيم گوندوزلر اوخويارميش، آخشاملار سو داشييار، يوك داشييار، داها سونرالار، ساواد كسب ائتديكده، اؤزو و كيچيك قارداشي اوچون گوندهليك چؤرك پولونو هميئرليلري اوچون مكتوب، عريضه يازماقلا قازانارميش.
آتام، بئش ايلليك تحصيل آلديقدان سونرا گؤيچاي شهرينده قضا ناچالنيكينين دفترخاناسيندا ترجومهچي و ديلمانج صيفتي ايله ايشلهميشدير. او، اؤز زمانهسينين موترققي گؤروشلو بير آدامي اولوب. آذربايجاندا اؤز قيزيني دونيوي مكتبه قويموش ايلك آداملاردان بيري اولموشدور.
منيم باجيلاريم چادراسيز گزيرديلر. بو "قباهت" اوچون گؤيچايين مورتجئ آداملاري بيزيم عائلهميزه دينيندن دؤنموش، "بهايي" لقبي وئرميشديلر. منيم آنادان اولدوغوم گؤيچاي شهري آذربايجانين ان جاوان شهرلريندن بيريسيدير، اونون جمعيسي 100-120 ياشي اولار.
بيرينجي جاهان محاربهسينه قدر بورا اوجقار بير يئر ايميش، بير دنه ده اولسا، سنايئ موسسيسهسي يوخ ايميش.
گؤيچاي ساكيت بير قضا حياتي كئچيريردي. شهرده ايكي مسجيد وار ايدي؛ بيري شيعه مسجيدي، بيري سونني مسجيدي. شيعه مسجيدينده مقدس ايماملارا فاجعهلي و دهشتلي ماتم مراسيمي كئچيريليردي. ماتهمين اونونجو گونو - آشورا گونو آداملار اؤزلرينه عذاب-ايشگنجه وئريرديلر. قتل گونو باش يارانلارين ايچريسينده اؤلنلر ده اولوردو. فاناتيك ديندار آداملار خنجر چيخاريب اؤز باشلارينا وورور، مقدس آداملارين شرفينه قانلاريني آخيديرديلار. من و ياشيدلاريم بئله تاماشالارين بيريني ده بوراخميرديق. بيز بوتون بو مراسيمين مقدسليگيني باشا دوشمكدن چوخ اوزاق ايديك. بيز اوشاقلار اوچون بو احوالاتلار بير آز قورخولو و عيني زاماندا، سون درجه ماراقلي، بضا ده گولمهلي بير تاماشا ايدي: كيم ايسه قورخوب خنجري باشينا وورا بيلمير، كيمين ايسه آياغي بودرگيب ييخيلير. بير ده گؤرورسن چادرايا بورونموش قادينلار آراسيندا داوا قوپوردو. بونلار هاميسي كيچيك قضا شهرينده اوزانيب گئدن اؤلگون و جانسيخيجي حياتدان چوخ-چوخ ماراقلي ايدي.
آنام فضوليني، ناتواني و صابيري اوخوياردي. ياديمدادير، آخشام چاغلاري آنام بيزه - منه و دؤرد باجيما قملي شئرلر اوخوياردي.
-بونلار كيمين شئريدير - دئيه سوروشارديم.
-ننهنيزين اوزاق قوهومو و هميئرليسي خان قيزي ناتوانين.
آنام گؤزل شاعره و اجتماعي خاديم اولان ناتواندان دانيشار، قوربتده اؤلن فضولينين قملي طالعييندن سؤز آچاردي. آنامين اوخودوغو شئرلرين چوخوسو هميشهليك ياديمدا قالدي. آنامدان و ننمدن ائشيتديگيم ناغيللار و افسانهلر ده يادداشيمين آيناسيندان سيلينمهدي. ايندي يادداشيمين صحيفهلري واراقلانديقجا من بير داها اينانيرام كي، منيم كؤنلومه شئره اولان محبتيمين ايلك قيغيلجيملاريني آنام آتميشدير. آنام منده هم كلاسسيك پوئزييا خزينهسينه، هم ده خالق ياراديجيليغينا درين حؤرمت حيسسي تربييه ائتميشدير.
آلتي ياشيندا مكتبه گئتديم، اوخوماغي تئز اؤيرنديم. ان چوخ سئوديگيم مشغله بؤيوك شكافين رفلرينده سياهته چيخماق ايدي. بو رفلرده آذربايجان، روس و فارس ديللرينده كيتابلار وار ايدي. من ازبردن بير خئيلي شئر بيليرديم، لاكين اونلارين معناسيني سونرالار باشا دوشدوم. شئرين آهنگيني سئويرديم، آشيق دئييشمهلرينه قولاق آسماغي سئويرديم، ديني مراسيم تاماشالارينا باخماغي سئويرديم. بو مراسيملرده قملي مرسييهلر اوخونار، بضا ده قديم خالقلارين اوزاق اؤلكلرده آپارديغي قانلي ووروشمالار تصوير اولوناردي.
سونرا آغير تحصيل و ايش ايللري باشلادي. آتامين اؤلوموندن سونرا وضعيتي گئتديكجه چتينلشن بؤيوك عائلهميزه كؤمك ائتمهلي ايديم. اون دؤرد ياشيندان اوخوماغا داوام ائدهرك، هم ده شهر كيتابخاناسيندا ايشلهمهيه باشلاديم. بو ايش منه بؤيوك ذؤوق وئريردي، من كيتابلار آراسيندا - ناملوم قريبه بير عالم ايچريسينده ايديم.
قيز قالاسي
یازار : نژادمحمد | بؤلوم : پوئمالار
قيز قالاسي،
باكينين،
داشدان كئشيكچيسيدير،
يوز ايللردن ياديگار؛
تنها، ساكيت دايانيب.
هردن بولودلار آخير،
دورنا قاتاري كيمي؛
ساللانيرلار اوفوقدن.
گئنيش، ماوي گؤيلرين
گوموش هاساري كيمي.
قالا، ساكيت دوماندان
سييريلان داش قايادير.
خزر هردن چيرپينير،
يارالي دورنا كيمي
هردن ساكيت خاي اولور.
قالا ساكيت دايانيب.
اوستونده گؤيگؤز سما،
اولدوز-اولدوز چيچكلي
اتهيينده گؤي دنيز
دالغالارلا بزكلي.
بو گون خزري اولايير،
داريسقالليق
یازار : نژادمحمد | بؤلوم : شعرلر
اوزون ايللر سيخدي مني:
گاه چكمهلريم -
بضا اوزونو، بضا ائني ايله،
گاه اؤتوب كئچن ايله تأسفوم.
گاه اوميديم، يئني ايله.
گاه دونيانين دردي، قمي سيخدي مني،
گاه جورابلاريمين بوغازي،
گاه آلچاق بولودلارين قالين پردهسي؛
گاه بير نادان قلهميندن
تؤكولن يازي.
گاه آوتومات قلهمين باهاليغي.
گاه سؤزون اوجوزلوغو.
گاه كؤينهييمين ياخاليغي.
قيريب چيخماق ايستهديم
"اولار"، اولماز" چرچيوهسيندن.
دئديلر يوخ، يوخ!
دبلره، قايدالارا گير!
ورديشلري، عادتلري گؤزله!
سيغاللي ديلله ياز!
سيخديلار مني،
ماددهلرله، سؤزلرل…
ايش اوتاغيم
اون ايكي مئتر ياريم.
آلتيسيندا
من،
يازي ماسام،
حسرتيم، اوميديم.
صابير.
هئمينقوئي.
تاواندان سوزولن دامجيلارين ايزي.
بريجيد بوردونون
بيغسيز، پيشيك اوزو.
فالك، ميكاييل،
تاغي،
بهلولون نوهسي.
ايلك سيرادا اولماق
و قالماق هوسي.
آلتي مئتر بئله.
آلتي ياريم:
كيتابلار، كيتابلار، كيتابلاريم.
پنجرهلر سيخدي مني
اوزونسوو دؤردبوجاقدا گؤستريب
كوچهنين ائولرله سرحدلنميش يارغانيني.
ماشينلار سيخدي مني
ماركالارينا موناسيب.
سيخدي مني واقونلارين
گوزگولو كوپئلري و
يول حساباتيني يوخلايان موهاسيب.
مسافهلر مئترلرله،
ايشيق كيلوواتلارلا دولدورولوب.
نغمهلر اوكتاوا ايچينده
خستهلرين هرارتي
درجهلر ايچينده.
ايري مئيوهلر دنهلره،
اوزوم-گؤز ياشي گيلهلره دولوب.
شهريمين ياشيلليغي
اؤلچولوب، بيچيليب
سالينيب رقملره.
داغلار داريخيب گؤيه قالخيب
درهلر چؤكوب يئره.
داريخير اينسان
حدودلار، اؤلچولر ايچينده.
يايدا اوزون گوندوزلر،
قيشدا اوزون گئجهلر ايچينده.
دئييرم:
اؤلنده، آتين
ان درين دريايا مني؛
قالديريب بولودلاردان يوخاري!
سون يولوم اوزون،
سون منزيليم گئنيش اولسون باري
يوخ، يوخ.
ان درين دريالار دا
ساحللرين چنبري ايچيندهدير.
گؤرونور،
داريسقالليق كناردا دئييل؛
هر مئيوهنين توموندا،
هر جانلينين هوجئيرهسينده،
هر بينانين داشيندا، كرپيجيندهدير.
گؤرونور،
يولوموز بودور.
صرورتي درك ائتمهيينجه
گئديريك، گئدهجييك
داريسقالليقدان كئچه-كئچ…
سوروش
یازار : نژادمحمد | بؤلوم : شعرلر
اود نه چكدي،
كولدن سوروش!
باش نه چكدي،
ديلدن سوروش!
ايشه سوسوز بارماقلارين
كدريني اينسان بيلير.
نغمهلرين حسرتيني
بير قيريلميش تئلدن سوروش!
عومرون چتين يوللاريندا
داشا لپير سالسا آياق،
گون نه چكدي،
ايلدن سوروش!
ظلمتليگين مؤهنتيني
كور سؤيلهسين!
بم خاللارين فرياديني
زيلدن سوروش!
من كؤلگهسيز باغ گؤرمهديم،
ائل دردي تك داغ گؤرمهديم،
گؤزلريمي يوموب آچديم
نئچه دوستو ساغ گؤرمهديم.
نهلر چكدي چايلاق داشي
سئلدن سوروش!
يوللار اوزون، منزيل اوزاق.
سرت داشلارا دؤزمور آياق.
دؤزسون گرك.
دؤزسون گرك.
كيم زيروهيه قالخار، دئيين،
يوللار بويو هر پيللهني
بيرگونلري، يوزيللري
قلبيميزله،
بئينيميزله
عومروموزله
دولدورماساق.
من يولچويام
اود نه چكدي،
كولدن سوروش!
هانسي شعريم،
هانسي سؤزوم
ياشاياجاق مندن سونرا؟
من بيلميرم،
ائلدن سوروش!
باكي، يانوار، 1964
من تورپاغام
یازار : نژادمحمد | بؤلوم : شعرلر
من تورپاغام، مني آتش يانديرماز؛
تركيبيمده كؤموروم وار،
كولوم وار.
من باهارام چمن-چمن
چيچهييم وار، گولوم وار.
من كولهيم، اسمهسم،
كيم بيلر كي، من وارام.
من بولودام، صحرالاري سوسوز گؤروب،
آغلارام.
من اوره يم، دؤيونمهسم
اؤلهرم.
من اينسانام،
ساده اينسان الينين
ياراتديغي نعمتلرله اؤيونمهسم
اؤلهرم.
من ايشيغام - قارانليغين قنيمي،
من اينسانام،
داشيييرام قلبيمده
دونيالارين سئوينجيني، قميني.
ماراق دولو گؤزم من،
باخمايا بيلمهرم.
قارلي داغدان سوزولن چايام من،
آخمايا بيلمهرم.
من اينسانام،
وطنيم وار، ائليم وار.
ان بؤيوك حقيقتي،
آزادليغي، محبتي، نيفرتي -
سؤيلهمهيه قادير اولان
ديليم وار.
من بير قرانيتم كي،
هر پارچامدا دويولور
بركليگيم،
دؤيوشده مؤحكمليگيم،
اولفتده كؤوركليگيم.
من اينسانام، اولفتسيز -
اؤلهرم.
محبتسيز، نيفرتسيز -
اؤلهرم.
من بولاغام،
تاپشيريقلا آخميرام.
من حياتام،
هميشه يولدايام:
نفسدهيم، آرزودايام،
باخيشدايام، اوركدهيم، قولدايام.
من تورپاغام، نعمتيمي، واريمي
زحمت سئون اينسانلارلا بؤلهرم.
من اوره يم، دؤيونمهسم
اؤلهرم.
چينار
یازار : نژادمحمد | بؤلوم : شعرلر
گئجه كئچميش، اولدوزلار آغ، گؤي قارا!
سؤيكنميشم قوجامان بير چينارا.
بير يانيمدا عومور كيمي آخير سو،
قاچميش بو گون تبيتين يوخوسو.
بوداقلاردا سرين يئلين خوش سسي.
يارپاقلارين هزين-هزين نغمهسي.
اورگيم بير قانادلانميش قوش كيمي
هئي چيرپينير، تسلليسيز، عصبي.
هوندور چينار بوداق آتميش، قول آتميش،
اؤز عومرونده چوخ عصرلر قوجالتميش.
گؤركمينده قارلي داغلار ووقاري.
باشي بوتون آغاجلاردان يوخاري.
توفان قوپار، ياغيش ياغار، قار تؤكر؛
اود قامچيلي ايلديريملار گؤي سؤكر.
بزن چايدا داشلار داشي قووالار.
سئلده گئدر گؤي چمنلر اووالار.
يارغان يارار سينهسيني داغلارين.
سولار اويار بينهسيني داغلارين.
كاروان چكر گؤيده قارا بولودلار.
چووغون گلر، شاختا كسر، بوز دونار.
خان چيناريم ايمز مغرور باشيني.
كيمسه بيلمز خان چينارين ياشيني.
گئجه قارا، دوردوم دوشوندوم بير آز،
دئديم ندن اولو چينار ييخيلماز؟
بيردن چينار ديله گلدي دئدي: - باخ!
بو تورپاقدا دريندن كؤك سالاراق،
هر ترفه اوزاتميشام قولومو،
اؤولادلاريم بورويوب ساغ-سولومو.
بئله مغرور دايانماغا حاقلييام.
من كؤكومله بو تورپاغا باغلييام.
يالتا، 1935
- [ 1 ]