قيز قالاسي
یازار : نژادمحمد | بؤلوم : پوئمالار
قيز قالاسي،
باكي‌نين،
داشدان كئشيكچيسيدير،
يوز ايللردن ياديگار؛
تنها، ساكيت دايانيب.
هردن بولودلار آخير،
دورنا قاتاري كيمي؛
ساللانيرلار اوفوقدن.
گئنيش، ماوي گؤيلرين
گوموش هاساري كيمي.
قالا، ساكيت دوماندان
سييريلان داش قايادير.
خزر هردن چيرپينير،
يارالي دورنا كيمي
هردن ساكيت خاي اولور.
قالا ساكيت دايانيب.
اوستونده گؤيگؤز سما،
اولدوز-اولدوز چيچكلي
اته‌يينده گؤي دنيز
دالغالارلا بزكلي.
بو گون خزري اولايير،
قوروبون فيرچاسييلا
اوفوقدن ساحلتن
خزر اودا بويانيب؛
دالغالاري آلوودان
ديل-ديل فوواره‌لردير.
قالخير، يوبانير، ائنير.
قالا ساكيت دايانيب.
قالانين اته‌يينده
ايكي قوجا اوتوروب
گاه قالايا باخيرلار،
گاه دنيزه.
اونلارين صؤحبتيندن
صؤحبت آچيرام سيزه.
بيري دئيير:
گؤره‌سن، بو قالا
كيمدن قاليب؟
داشلاري اويوم-اويوم.
رنگي بئله قاراليب.
ايكينجي قوجا دئيير:
بو قالانين قريبه
نئچه حكايتي وار
قاريشيب بير-بيرينه
حقيقتلر، يالانلار.
يازيلاردا ياييليب
نه قدر سؤز-صؤحبتي
عاغيل كسن، ايناملي
بئله بيري ده واردير؛
دوغرويا چوخ اوياردير.
ائشيتميشم بابامدان
يئتميش ايل بوندان قاباق.
دئييردي: - بيري وارميش،
بيري يوخ.
بيزيم قديم باكيدا
خان دمير آدلي قوچاق
مشهور بير خان وار ايميش.
يئتميش كندي، اوباني
حؤكمونده ساخلار ايميش.
اونون دورناخان آدلي
گؤزل-گؤيچك بير قيزي،
ياشيلبه‌ييم آديندا
بير آروادي دا وارميش.
گؤزونون آغ-قاراسي
بيرجه قيزميش اؤولادي.
خان بو دورنا گؤزله
وئريب دورناخان آدي.
دورنا خورمايي ساچلي
آلاگؤز بير قيز ايميش؛
اوخ آتماغا هوسلي،
آت چاپماغا آليشميش
آخشاملار، گؤي خزرين
ساحلينه گلرميش.
سولارا قولاق آسار،
كؤنولدن دينجه‌لرميش.
دئييرميش آي، سن چيخما،
من چيخيم.
سحر گونه دئيرميش:
گون سن چيخما، من چيخيم…
خان يئگانه قيزيني
يامان عزيزله‌يرميش.
ايستيدن قورويارميش،
كولكدن گيزله‌يرميش.
ياشيلبه‌ييم ده قيزا
باخيب، فرحلنرميش.
اؤزو قويماق بير گلين.
مرجان دوداق، اينجه ديش.
ياشيلبه‌ييم، دئييرلر،
قاراباغلي قيزييميش.
او دا خان آتاسي‌نين
بيرجه‌سي، يالقيزييميش.
دئييرلر، دورناخانين
سيرما ساچلاري وارميش،
هر باخاني بو گؤزل
درحال اووسونلايارميش.
دورنا بيردن گؤرونسه
آي گيررميش بولودا،
گون ده خجالتيندن
ايسترميش روبند توتا.
ايل بويونجا باهار، قيش
بو سارايدان سمه‌ني
بير گون اسكيك اولمازميش.
محبتين، باهارين
رمزي ايميش سمه‌ني؛
چاغيرارميش اولفته،
باهارا هر گؤره‌ني.
دورنانين گؤزلرينه
چوخلاري وورغون اولوب
نئچه ايگيد حسرتدن
يانيب-يانيب قوورولوب.
دورناخانين سوراغي
دولاشيب ديلدن-ديله.
دورنا سئوينديرمه‌ييب
عاشقلردن هئچ كسي
كؤنول محبتييله.
دورناني آناسييلا
هر كس گؤرسيدي بير آن
دئيردي: - "بير آلمادير
تن بؤلونوب اورتادان".
هر عزيز نووروز گونو،
خانا نئچه اؤلكه‌دن
هديه‌لر گلرميش،
نه‌لر، نه‌لر گلرميش،
ميرواري، قيزيل، گوموش،
الوان تبريز تيرمه‌سي،
زرلي دربند دؤيمه‌سي،
جايداق كهر اورگه‌لر -
قاراباغ يئتيرمه‌سي.
سوفره‌لر آچيلارميش.
هر گون خانين ائوينده
دوه‌لرين يوكونه
دئيير، گوجو چاتمازميش،
بوينوزلو آغ ديوين ده.
لؤيون-لؤيون خؤركلر:
مئيوه، حالوا، خام شكر،
قاب-قاجاق قيزيل، چيني.
دئيير، سايا گلمزميش
دئسن يوزده بيريني.
سايسيز كؤله، قاراواش
خيدمت ائلرميش خانا.
آغير زحمت ايچينده
قرق اولوب تره-قانا.
بير گون خانين ائوينده
يامان واي-شيون قوپور.
دورنانين گؤز ياشلاري
ياناغيندان سوزولوب،
داشا، تورپاغا هوپور.
اوچ گون چكير آزاري
خسته ياشيلبه‌ييمين.
قارا رنگه بويانير
بوتون ساراي اهلي‌نين
زر-زيبالي گئييمي.
گؤزو ياشلي دورناخان
او گوندن يئتيم قالير
سولور آلا گؤزلري،
لاله رنگي سارالير.
دورنا يورغون باشينا
قارا آتلاز باغلايير.
گئجه-گوندوز دينجلمير،
آنا دئييب آغلايير
غضبلي خان
خان دمير
يئددي گون، يئددي گئجه
سو ايچمير، يئمك يئمير.
خان گؤرور قيزي دورنا
اريگير خيففتيندن
دورنا اونا عزيزميش
بوتون وار-دؤولتيندن
دئيير:
- قيزيم، نئيله‌يك
گؤرونور بودور قدر
نه اولدويا چاره وار،
نه اؤلدويه، دئيرلر.
بير آرزونو دئ منه،
موشكول اولسا دا، يئنه
ائله‌ييم جانلا، باشلا،
قيزيم، اونوت دئميرم،
بيليرم مومكون دئييل…
آنجاق كي اورگي‌نين
بو آغير قملريني
بير آز اوووت دئييرم.
بو آتا سؤزلرييچون
دورنا، مني باغيشلا!
دورنا دئيير: - خان آتا!
بوردا، لپدؤينده
هوندور بير قالا تيكدير؛
باشي گؤيلره چاتان.
اته‌يينده خزرين
لپه‌لري اويناسين.
من قالانين باشيندان
هر گون، هر آخشام، سحر
گؤروم نئجه اوينايير
قيرچين-قيرچين لپه‌لر.
دنيزين نغمه‌سينه
دويونجا قولاق آسيم.
خان دئيير: - آرزولارين
دوغرولاجاقدير، قيزيم.
سن ايسته‌ديگين قالا
خزرين سولاريندا
قورولاجاقدير، قيزيم.
آداملار گؤندريلير
بوتون آذربايجانا؛
دؤرد طرفه، دؤرد يانا.
نئچه شهره، ائله
تبريزه، صبايئله،
شاماخييا، دربنده،
قبله‌يه، برده‌يه،
شكييه، ناخچيوانا
قديم اؤرنقالايا،
ماراغايا، هر يانا
چاغيريشا چوخ صنعتكار،
چوخلو داش‌يونان گلير.
چوخ تجروبه‌لي اوستا،
چوخلوجا جاوان گلير؛
هر اوستانين يانيندا
يئتميش يئددي شاگيردي،
قول-قاراواش دا گلير.
صبايئل شهريندن،
جاوان اوغورلا بيرگه،
يئددي قارداش دا گلير.
اوغور اوستاباشييميش،
يونقار-يونقار يوندوغو
سرت صبايئل داشييميش.
ايشه باشلايير هامي
تجروبه‌لي اوستالار،
فحله‌لر ايزديهامي.
اوغور دوزنله‌ديكجه
سرت صبايئل داشيني،
نغميله سسله‌ييرميش
اؤز آلتي قارداشيني.
اوغور ايشله‌ين يئرده،
هر گون قالا ديواري
بير خان آرشيني قدر
ائنلنر، يوكسه‌لرميش
دورناخان دا هر سحر
تيكينتييه گلرميش.
گؤردوكجه قاينار ايشي،
اوغورون دوداغيندا
پؤهره‌لنن گولوشو،
درددن بير آز آيريلير،
كؤنولدن دينجه‌لرميش.
بير گون، ايكي گون بئل…
قالانين ديواريندان
كؤلگه دوشدو دنيزه،
كؤلگه دوشدو ساحله.
دورنا گؤروردو نئجه
سرعتله اوستا اوغور
داشلارا سيغال چكير،
دوزور، اوست-اوسته ييغير.
اوغور ديواري هؤرور،
تئز-تئز دورنايا باخير،
لنگيگيردي، چاشيردي
داشلار دوشمور يئرينه،
دوزوموندن آشيردي.
اوغور بيردن آييلير،
باخيب گولومسه‌ييردي
داش ياخشي يونولماييب
هئچ دوز گلمير دئييردي.
سؤكوردو تيكديگيني،
دويونجا دورناخانين
ساچلاري‌نين ايگيني،
يئنيدن باشلاييردي،
داها جوشغون هوسله
قورشانيردي ايشينه.
تيشه‌سييله داشلاري
بير-بير ناخيشلاييردي.
هر گون ايش قورتاراندا
گؤروردون، بر-بزكلي
بير داشين اوزرينده،
قاضيليب دورنا شكلي.
دورنا دا چاشديغيني
گؤروب اوستا اوغورون
گولوردو اوغون-اوغون.
ايلك باخيشدان دورناني
اوغورون گؤزو توتدو.
دورنانين داش قلبينده
ايلك محبت اوياندي.
گون كئچديكجه ائله بيل
دردي-قمي اونوتدو.
دورنانين گؤزلرينده
هر شئي اوغورا دؤندو:
هر طرف اوغورلاندي،
بؤيوك محبت اودو
ايكي اوركده ياندي.
فرهاد-شيرين سئوگيسي،
بونا باخسان، يالاندي.
گون كئچدي، آي دولاندي،
مؤهتشم قيز قالاسي
دالغالاردان بويلاندي.
يئتميش يئددي گون چكدي
قالانين هؤرولمه‌سي.
قالا بير هؤرگو اولدو،
سال داشدان هر ايلمه‌سي.
ياشيلبه‌ييمين او گون
چيخدي قارا بايرامي.
شنليك آلدي قوينونا
باكيدا ايزديهامي.
قالانين قورتارماسي
بؤيوك بير بايرام اولدو،
گئجه‌ني گوندوزله‌ين،
ظلمتي تميزله‌ين،
نئچه يوز مين شام اولدو.
چالديلار، چاغيرديلار
تا آچيلينجا سحر.
دسمال آليب اوينادي
بوتون مجليسده‌كيلر.
آنجاق دورنا نه گولور،
نه ده بير شادلانيردي
اونون قلبي سيزلايير،
ايچين-ايچين يانيردي.
گؤروردو بير طرفده
ساكيت دايانيب اوغور.
گؤروردو كي، اونو دا
آغير فيكيرلر بوغور.
بو توي-بايرام دورنايا
آيريليقدان خبردي.
آجي حسرت يولوندا
اينجيكلي بير صفردي.
هامي چكيلدي گئتدي،
دورنا تك قالدي يئنه
يوووشموردو او گوندن
دورنا ساراي اهلينه
هر گون قالخير قالايا،
باخيردي صبايئله.
اوغورو گؤزله‌ييردي
سحر شفقلرييله.
اوغور وعده‌يه صادق
هر گون ائرته‌دن، سحر
قيزيل رنگه گيرنده
گؤي دنيزده لپه‌لر،
دورناسيني گؤرمه‌يه
گليردي قوش ساياغي.
دالغالارين اوستونده
ايسلانمادان آياغي.
داش قالانين اوستونده
سئوديگيني گؤروردو.
دورنانين محبتي
اونا قاناد وئريردي.
دالغالارين اوستويله
يئريگيردي بيرباشا.
بير معجزه گليردي
گؤرنه بو تاماشا.
اوغور بيليردي دورنا
سئوير اونو اوركدن؛
قانادلانيردي اوغور،
سولاردا يئريمكدن.
اؤزو ده حئيران ايدي
محبتين گوجونه.
يالمانديقجا لپه‌لر
آياغي‌نين اوجونا.
دورنانين محبتي
روحلانديرديقجا اونو
اوچا-اوچا گليردي،
سو اوستونده يولونو.
دورنا قالا باشيندان
گلن گؤرور اوغورو،
سينه‌سينه سيغميردي
سئوينمه‌سي، قورورو.
هاوادا يئلله‌ييردي
آل ايپك اؤرپه‌ييني،
اوستو ظريف تيكمه‌لي
گول-چيچك اؤرپه‌ييني.
گونلر كئچيردي بئل…
ياشاييردي ايكي گنج
شيرين آرزو-آرزويا،
خوشبخت كؤنول-كؤنوله.
دورنانين سئوگيسيندن
خبرسيزدي خان دمير.
ال-آياق ييغيشاندا،
كسيلنده سس-سمير -
چكيليب اوتاغينا
گؤزل ياشيلبه‌ييمين،
خياللارا داليردي،
آغير فيكيرلي، قمگين.
دورنا نه گئجه ياتير،
نه گوندوز دينجه‌ليردي.
بير گونلوك اينتيظاري
اونا بير ايل گليردي.
بير گون قالا اوستونده
گؤرونمه‌دي دورناخان
گؤيدن قارا بولودلار
كئچيردي كاروان-كاروان
گئجه چوخ آغلاميشدي،
يورغون، اينجيكدي دورنا.
سحر قالا اوستونه
خئيلي گئجيكدي دورنا.
اوغور دنيز يولونا
پييادا چيخدي يئنه.
اينانمادي قالايا
باخاندا، گؤزلرينه.
قالادا دورناخاني
گؤرمه‌دي، نئجه ايشدي.
ائله بيل گؤزلرينده
بوتون عالم ديَيشدي
بير قيي ووردو هارداسان،
بير جاواب وئر، دورناخان…
گؤيدن قارا بولودلار
آخيشدي كاروان-كاروان.
دنيز اوستو يولوندا
بير آن يوباندي اوغور
كؤپوكلو بير دالغادا
بيردن داياندي اوغور.
قلبينده ياواش-ياواش
شوبهه آرتدي، بؤيودو.
گؤردو دنيز قارالدي،
اينديجه گؤمگؤي ايدي.
قارا شوبهه قلبيندن
آسيلدي - بير قارا داش.
محبتين آتشي
سويودو ياواش-ياواش
دئيير: - يقين سئومه‌يير
آرتيق دورناخان مني.
يقين ساراليب، سولوب
سارايداكي سمه‌ني…
قلبينده‌كي اينامي
بير آندا لكلندي
قلبينه اوميدسيزليك
قارا بولود تك ائندي.
كؤنلونده قانادلانان
اينام شؤله‌سي سؤندو.
آياغي‌نين آلتيندا
يوميومشالدي دنيز.
سولار بير موما دؤندو.
هر دالغا پارچالاندي،
آخيري قوما دؤندو.
سولار اوستونده قرار
توتمادي آياقلاري
آرتيق قانادلانماغا
قالمادي اينتيظاري.
كؤپوكلو دالغالاردا
سويا قرق اولدو اوغور.
محبتسيز-قانادسيز
باتدي، بوغولدو اوغور.
يورغون دورنا قالادا
گؤروننده بو زامان
اوغور آرتيق يوخ ايدي.
دالغالاردا بيرجه آن
دورنانين ياديگاري
ايپك يايليق گؤروندو.
بير آن كئچمه‌دي او دا
دومانلارا بوروندو.
دورنا درين آه چكدي،
آتدي سويا اؤزونو
"اوغور گلديم دالينجا!" -
سؤيله‌دي سون سؤزونو.
قالا ساكيت دوماندان
سييريلان بير داش قايا…
خزرين سينه‌سينده
چارپير دالغا دالغايا.
خزري جوشور، اولايير…
سحرين فيرچاسييلا
اوفوقدن ساحلتن،
شوباني داغلاريندان
قديم صبايئلتن
خزر اودا بويانيب.
فيرتينا آسلانلاشيب.
دالغالاري آلوودان
ديل-ديل فوواره‌لردير.
قالخير، يوبانير، ائنير،
قوجانين سؤيله‌ديگي
بو قديم حكايتي
زامان ايللر ايچينده
اونوتدورور، اريدير.
يازديم ائشيتديگيمي
عاجيز قلميمله من.
هاني بؤيوك شئكسپير،
بو قملي حكايتي
قودرتلي قلمييله
جانلانديرسين يئنيدن.
گؤيچاي، سئنتيابر-اوكتيابر، 1980
بلاگا گؤره
بؤلوم لر
سون یازیلار
باغلانتی لار
یولداش لار
آرشیو
سایغاج
ایمکان لار
